Zwëczajno pleszczenié

CSBTV – Part II

Mark — Sun, 19 Sep 2010 10:04:13 +0000

Drupal to baro dobrô systema sprôwianiô zamkłoscą (CMS), czasã równak nie słëchô sã òna naji tak jak ma bë chcelë.
Kaszëbskô telewizëjô CSBTV dôwô nama w tich dniach dobrą ùczbã infòrmaticzny słowiznë na swòjich starnach.

Fatalnô fela – Czile dni nazôd mómë sã tegò ju naùczoné

Dzysô przëszed czas na nowé słowò

Warning – co pò kaszëbskù òznôczô -> Òstrzéga

Na pòwôżno gôdając, to móm nôdzejã, że to ju slédnô ùczba kaszëbsczi infòrmaticzny słowiznë na przëmiôrze tich starnów ë że sã to w kùńcu skùńczi, bò dobrą reklamą to co je widzec nie je. Problemą nie je ùsôdzanié starnów przë chtërnych wëchôdaja fele, problemą je, pòdle mie, jeżlë je to widzec ù firmów. Dopùszczalné je takô systuacëjô ù zwëczajnych lëdzy co z tegò nie żëją ë ùsôdzają swòjé priwatné starnë. Tuwò mómë równak jedna firmã co dała robòtã drëdżi, a fele cygna sã jak narô przez czile dni.

CSB TV

Mark — Thu, 09 Sep 2010 18:08:57 +0000

Jô mëszlôł na jinszim placu napisac wiadła ò CSB TV. Móm wëszëkóną jich internetową starnã, żebë cos wicy wëdowiédzë dobëc, a tuwò proszã – jak niżi (to samò ze starnama Radio Kaszëbë).

Linuxcsb 2

Mark — Mon, 06 Sep 2010 20:39:01 +0000

Mómë ju drëgą wersëjã kaszëbsczégò Linuksa ùprzëstãpnioną do zladënkù. Në ë jak to ju je z taczima niszowim ùdbama, wicy trzôskù dało (ë to samò z se, bez niżódny jinicjatiwë z naji starnë) jak jesz mało co bëło fardich, jakno terô, jak ju mómë sã pò prôwdze baro wiele przë tim narobioné.

Linux sam w se je niszowim (w òglowim brëkùnkù léży dzes kòl MacOS, chòc tuwò wiele do statysticzi dodôwôją serwerë, chtënych baro wiele robi pòd Linuksã), chòc je to ze swòjima graficznyma òkrãżama baro prostô do robòtë z nią systema – lëdze mają zwëczajno stracha przed tim, czegò nie znają, a że są przënãceni do jednegò to je jima téż drãgò òd tegò òdeńc.

Jo, Linux je niszową òperacjową systemã, a do tegò jesz pò kaszëbskù to mómë z tegò ju nôrcëk, co je dzes czësto w kùńcu sklépù . Nimò tegò rôczã do zapòzaniô sã z nają wersëjã, chtërną mòże brëkòwac prosto z wëpôlony platczi. A jeżłë sã jesz chto najdze, chto bë chcôł ò tim dac wiadło, to nãdzemë z tegò na gwës baro rad.

Mómë ju drëgą wersëjã kaszëbsczégò Linuksa ùprzëstãpnioną do zladënkù. Në ë jak to ju je z taczima niszowim ùdbama, wicy trzôskù dało (ë to samò z se, bez niżódny jinicjatiwë z naji starnë) jak jesz mało co bëło fardich, jakno terô, jak ju mómë sã pò prôwdze baro wiele przë tim narobioné.

Linux sam w se je niszowim (w òglowim brëkùnkù léży dze kòl MacOS, chòc tuwò wiele do statysticzi dodôwôją serwerë), chòc je to ze swòjima graficznyma òkrãżama baro prostô do robòtë z nią systema – lëdze mają zwëczajno stracha przed tim, czegò nie znają, a że są przënãceni do jednegò to je jima téż drãgò òd tegò òdeńc.

Jo, Linux je niszową òperacjową systemã, a do tegò jesz pò kaszëbskù to mómë z tegò ju nôrcëk, co je dzes czësto w kùńcu sklépù . Nimò tegò rôczã do zapòzaniô sã nają wersëjã, chtërną mòże brëkòwac prosto z wëpôlony platczi. A jeżłë sã jesz chto najdze, chto bë chcôł ò tim dac wiadło, to nãdzemë z tegò na gwës baro rad.

Jes tuwò perzoną

Mark — Wed, 27 Jan 2010 21:02:05 +0000

Jo – jô sedzôł sztël, Në le céż je robic, jakno sã je Kaszëbą ë drëdzy kôżą trzëmac pësk. Ma Kaszëbi mómë to do se, że słëchómë sã drëdżich ë to na gwës barżi jakno sómych se – takô nôtëra

Ach jo – jakòs jô przez wicy jakno rok nie jem do tegò doszłi żebë tuwò cos naskrobac. Jakno zadoscùczënienié dajã Wama fejn zdrzucënk ekranu, jaczi mòże dobëc na starnach K-PZ ë to ju òd lat. Móm co nômni ze dwa razë do nich ò tim pisóné z prosbą, żebë to naprawilë ë…… ë nick ë diachôl wié dlôcze. Dzysô tak sã mëszlã, że to mòże je jakô reklama czegò, czë co? Ach nié! Ju wiém ! To mùszi bëc pòchwała hùmanizmë, në bò czëtómë tam „Jesteś tu osobą” – jo, jaż miło to ùzdrzëc, że człowieczëzna jesz w cyfrowim swiece je

"Jes tuwò perzoną"

m.k.

Sznëpòrznik – Zemia doch plaskatô je

Mark — Mon, 13 Oct 2008 18:55:20 +0000

Në to móm w kùńcu nié le pòlsczé starnë kaszubia.com, le téż kaszëbsczé przeniosłé na WordPress – jo, jo doch na WP, chòc rëchli móm co jinszegò pisóné (tak to ju je z tima białkama ). Króm tegò jesz mómë z Jureka òd Hinców zrëszony anielskòjãzëkòwi dzél starnów. Z tegò to jem pò prôwdze baro rad, rozmiejã sã z nim baro dobrze, je tak stôri jak jô ë pòchôdô téż z kaszëbsczi familëji ë parłãczi naji na ti rówiznie prawie wiele. To mòże dlô niejednëch są detale, le mie je pò prôwdze lżi wespółrobic z Kaszëbama prawie przez tã plemienną wespólnotã, za jaką jidą doznania jaczich nie je w sztãdze werosłi kòl naji sąsôd niékaszëba do kùnca richtich zrozmiec.

Joooo, a za tima zmianama na starnach jidze téż w parze to, że móm sparłączoné zamkłoscë bloga Sznëpòrznik ze starnama ë terô ju le tuwò wama bãdã pleszcził ò tim téż, że Zemia doch plaskatô je

Never trust a guy …

Mark — Fri, 03 Oct 2008 20:18:21 +0000

Jidąc stegna przëbliżaniô wama mni, abò też wcale, znónëch mùzycznëch karnów, ze słabòscą do rockòwi francësczi mùzyczi, mëszlã dzysô waji òdesłac do parisczégò karna Les Wampas (nie mëszlita, że to fejn zwãczné miono je?). Les Wampas grają ju ze sobą òd 1983 rokù, jich mùzyka je przëpisëwónô do punka ë téż do psychobilly.
Niżi przëmiôr ùsôdztwa tegò rokòwégò karna, jaczi pòchôdô z singla z 2003 rokù, “Never trust a guy who after having been a punk, is now playing electro” (w wòlnym dolmaczënkù: “Nigdë nie dôwôj wiarë chłopù, chtëren pò bëcô punkã, terô elektroniczną mùzyka graje“), jaczi je kritiką dzéjaniô Manu Chao, chtëren to pòdle mùzyków Les Wampas pòddôł sã systemie.

Jô nie wiedzôł…

Mark — Thu, 02 Oct 2008 05:38:28 +0000

Na òdpòwiesc (pisóné jô miôł wama ò tim rëchli) nie trza bëło długò żdac – mòże z gòdzënã pò tim jak móm wama napleszczoné ò tim, je òna do mie doszłô. Ni móm zwëkù cëtowac priwatny kòrespòndecëji, stądka le òpiszã to wãzłowato.
Òdpòwiedzalny za starnã mô pisóné, że nie wiedzôł ò tim, że nen òdjimk słëchô sã jaczichs aùtorsczich praw ë że zdejmną gò tak chùtkò jak sã le dô ze starnë.

Starnë kaszuby.pl pò zjinace òdjimka

Zjinaczi ju je widzec, co ceszi, le pëtanie ò to, skądka na niewiedzô òstôwô ë je to drãgò zrozmiec.

Napiszã znowa: òdjimk bëł ùprzëstãpniony na tczi licencëji pòdle chtërny sygło le sã mie spëtac ò zgòdã brëkòwaniô bez mùszebnotë pòdôwania ùsôdzcë ë wszëtkò bë bëło w pòrządkù – lepi doch bëc nie mòże, dostôwóme doch pò òbgôdce zdrój jaczim nie mùszimë nikògò réklamòwac, chòc to ju chòba do “pòliticzi” aùtorsczich praw starnów kaszuby.pl nie przëstôwô. Tam mómë gwës terô prakticzno wszëtkò pòd zastrzégą – czë to je dobré rozwiązanié do promòcëji bëtowszi òbéńdë ë całich Kaszëb, to òstôwô pòstôwione w pòlu pëtaniô.

Letkòsc braniô

Mark — Wed, 01 Oct 2008 19:19:40 +0000

Ò tim jak letkò sã lëdze òbchòdzą z robòtą drëdżich, sómemù równak czãsto biôtkùjac sã ò swòją, móm ju pisóné rëchli w Pò sódmémù: Nie kradzë , a co do tegò co je lós na starnie kaszuby.pl téż w dopòwiescë do kaszuby.pl już on-line.

Në cëż, wprzód (pò mało miłëch rëchliszëch doswiadczeniach w taczich przëtrôfkach) mie sã nie chcało pisac do ùsôdzców starnów ò to, że łamóné są tam aùtorsczé prawa, a w kùńcu móm to doch zrobioné. To doch nie mòże bëc tak, że na starnach pisóné je ò tim, że wszëtczich tekstów ë òdjimków ni mòże kòpiérowac, ë że te przënôléżą do aùtorów, a sómemù je prawie tam apartno robioné.

kaszuby.pl - przédnô starna

Je to tim barżi smieszné, bò òdjimk je ùprzëstãpniony na baro wòlny licencëji ë sżło sã zwëczajno spëtac, czë nie mòże gò ù se brëkòwac ë nie bëłobë niżódny problemë.

Në jo, terô żdóm na òdpòwiesc – jem ji pò prôwdze czëkawi. Jak co przińdze, to wama jesz cos ò tim naskrobiã.

A tuwò z bòkù dlô pamiãcë nen òdjimk ze starnów, jaczégò zdrój mòżeta nalezc na wiki.

Czédës w Rëmi

Mark — Mon, 29 Sep 2008 21:12:22 +0000

Białka mòjegò kùzyna z Rëmi mie rôz gôda, że jak òni sã w 80-tëch latach miele bùdowóné na Szmelce, to jak szła pierszi rôz tam do krómù czëła blós kaszëbsczi jãzëk. Bòżena mia stracha, że sã nie dogôdô ë jak sta przed krómòwą, to mëszla, że bãdze mùsza palcã pòkazëwac co chce kùpic.
Dogôdac sã w kùńcu dogôda, a terô ju jinszé czasë przëszłé są ë ju w gardach wkół Trzëgardu corôz cãżi cos taczégò jesz trafic.

ZOO

Mark — Tue, 19 Aug 2008 06:33:32 +0000

Przez slédné dwa tidzenie móm sã kąsk òdsapniãté òd dodomù ë wiôldżegò gardu, zażëwając czëstegò lëftu Nordë. Fejn sparwą je miec drëchów z jaczima sã je sparłãczony wicy jakno 25 lat ë dali z nima mòże sã bùten sadnąc ë pògôdac jakno przódë.
Joooooo,,,
Jakòs przë tim wëpòczinkù wëskòcza na kùńc tidzenia jimprézka bùten. Wikszoscë z tich lëdzi jô nie znôł, le to nie je niżódnym ùtrapieniém. Sedząc tam czëjã, że jeden òbcy mie chłop ironiczno wëpòwiôdô sã ò Kaszëbach, na co móm cos jãzora chlapniãté – sóm nie wiém ju co, bò w taczich przëtrôfkach jem kąsk nioeòblëczalny (dlô klôrownotë dodóm, że z ùżiwków to ùżëwóm blós tobaka). Smieszno to wiedno w czims taczim je, bò chłopòwi sã zrobiło kąsk głupio (choc przekònóny ò tim, ze bëło to szczeré to nie jem) ë chcôł jakòs z tegò wińc ë rzecze mie z wësoka:

- Në to mòże cos rzeczesz pò kaszëbskù
na co móm krótkò rzekłé
- A co jô môłpa w ZOO jem?
Banana mie za to dôsz?

Në to chcemë le so zażëc