Jes tuwò perzoną

Jo – jô sedzôł sztël, Në le céż je robic, jakno sã je Kaszëbą ë drëdzy kôżą trzëmac pësk. Ma Kaszëbi mómë to do se, że słëchómë sã drëdżich ë to na gwës barżi jakno sómych se – takô nôtëra

Sznëpòrznik – Zemia doch plaskatô je

Në to móm w kùńcu nié le pòlsczé starnë kaszubia.com, le téż kaszëbsczé przeniosłé na WordPress – jo, jo doch na WP, chòc rëchli móm co jinszegò pisóné (tak to ju je z tima białkama ). Króm tegò jesz mómë z Jureka òd Hinców zrëszony anielskòjãzëkòwi dzél starnów. Z tegò to jem pò prôwdze baro rad, rozmiejã sã z nim baro dobrze, je tak stôri jak jô ë pòchôdô téż z kaszëbsczi familëji ë parłãczi naji na ti rówiznie prawie wiele. To mòże dlô niejednëch są detale, le mie je pò prôwdze lżi wespółrobic z Kaszëbama prawie przez tã plemienną wespólnotã, za jaką jidą doznania jaczich nie je w sztãdze werosłi kòl naji sąsôd niékaszëba do kùnca richtich zrozmiec.

Joooo, a za tima zmianama na starnach jidze téż w parze to, że móm sparłączoné zamkłoscë bloga Sznëpòrznik ze starnama ë terô ju le tuwò wama bãdã pleszcził ò tim téż, że Zemia doch plaskatô je

Never trust a guy …

Jidąc stegna przëbliżaniô wama mni, abò też wcale, znónëch mùzycznëch karnów, ze słabòscą do rockòwi francësczi mùzyczi, mëszlã dzysô waji òdesłac do parisczégò karna Les Wampas (nie mëszlita, że to fejn zwãczné miono je?). Les Wampas grają ju ze sobą òd 1983 rokù, jich mùzyka je przëpisëwónô do punka ë téż do psychobilly.
Niżi przëmiôr ùsôdztwa tegò rokòwégò karna, jaczi pòchôdô z singla z 2003 rokù, “Never trust a guy who after having been a punk, is now playing electro” (w wòlnym dolmaczënkù: “Nigdë nie dôwôj wiarë chłopù, chtëren pò bëcô punkã, terô elektroniczną mùzyka graje“), jaczi je kritiką dzéjaniô Manu Chao, chtëren to pòdle mùzyków Les Wampas pòddôł sã systemie.

Jô nie wiedzôł…

Na òdpòwiesc (pisóné jô miôł wama ò tim rëchli) nie trza bëło długò żdac – mòże z gòdzënã pò tim jak móm wama napleszczoné ò tim, je òna do mie doszłô. Ni móm zwëkù cëtowac priwatny kòrespòndecëji, stądka le òpiszã to wãzłowato.
Òdpòwiedzalny za starnã mô pisóné, że nie wiedzôł ò tim, że nen òdjimk słëchô sã jaczichs aùtorsczich praw ë że zdejmną gò tak chùtkò jak sã le dô ze starnë.

Starnë kaszuby.pl pò zjinace òdjimka

Zjinaczi ju je widzec, co ceszi, le pëtanie ò to, skądka na niewiedzô òstôwô ë je to drãgò zrozmiec.

Napiszã znowa: òdjimk bëł ùprzëstãpniony na tczi licencëji pòdle chtërny sygło le sã mie spëtac ò zgòdã brëkòwaniô bez mùszebnotë pòdôwania ùsôdzcë ë wszëtkò bë bëło w pòrządkù – lepi doch bëc nie mòże, dostôwóme doch pò òbgôdce zdrój jaczim nie mùszimë nikògò réklamòwac, chòc to ju chòba do “pòliticzi” aùtorsczich praw starnów kaszuby.pl nie przëstôwô. Tam mómë gwës terô prakticzno wszëtkò pòd zastrzégą – czë to je dobré rozwiązanié do promòcëji bëtowszi òbéńdë ë całich Kaszëb, to òstôwô pòstôwione w pòlu pëtaniô.

Letkòsc braniô

Ò tim jak letkò sã lëdze òbchòdzą z robòtą drëdżich, sómemù równak czãsto biôtkùjac sã ò swòją, móm ju pisóné rëchli w Pò sódmémù: Nie kradzë , a co do tegò co je lós na starnie kaszuby.pl téż w dopòwiescë do kaszuby.pl już on-line.

Në cëż, wprzód (pò mało miłëch rëchliszëch doswiadczeniach w taczich przëtrôfkach) mie sã nie chcało pisac do ùsôdzców starnów ò to, że łamóné są tam aùtorsczé prawa, a w kùńcu móm to doch zrobioné. To doch nie mòże bëc tak, że na starnach pisóné je ò tim, że wszëtczich tekstów ë òdjimków ni mòże kòpiérowac, ë że te przënôléżą do aùtorów, a sómemù je prawie tam apartno robioné.

kaszuby.pl - przédnô starna

Je to tim barżi smieszné, bò òdjimk je ùprzëstãpniony na baro wòlny licencëji ë sżło sã zwëczajno spëtac, czë nie mòże gò ù se brëkòwac ë nie bëłobë niżódny problemë.

Në jo, terô żdóm na òdpòwiesc – jem ji pò prôwdze czëkawi. Jak co przińdze, to wama jesz cos ò tim naskrobiã.

A tuwò z bòkù dlô pamiãcë nen òdjimk ze starnów, jaczégò zdrój mòżeta nalezc na wiki.

Czédës w Rëmi

Białka mòjegò kùzyna z Rëmi mie rôz gôda, że jak òni sã w 80-tëch latach miele bùdowóné na Szmelce, to jak szła pierszi rôz tam do krómù czëła blós kaszëbsczi jãzëk. Bòżena mia stracha, że sã nie dogôdô ë jak sta przed krómòwą, to mëszla, że bãdze mùsza palcã pòkazëwac co chce kùpic.
Dogôdac sã w kùńcu dogôda, a terô ju jinszé czasë przëszłé są ë ju w gardach wkół Trzëgardu corôz cãżi cos taczégò jesz trafic.

ZOO

Przez slédné dwa tidzenie móm sã kąsk òdsapniãté òd dodomù ë wiôldżegò gardu, zażëwając czëstegò lëftu Nordë. Fejn sparwą je miec drëchów z jaczima sã je sparłãczony wicy jakno 25 lat ë dali z nima mòże sã bùten sadnąc ë pògôdac jakno przódë.
Joooooo,,,
Jakòs przë tim wëpòczinkù wëskòcza na kùńc tidzenia jimprézka bùten. Wikszoscë z tich lëdzi jô nie znôł, le to nie je niżódnym ùtrapieniém. Sedząc tam czëjã, że jeden òbcy mie chłop ironiczno wëpòwiôdô sã ò Kaszëbach, na co móm cos jãzora chlapniãté – sóm nie wiém ju co, bò w taczich przëtrôfkach jem kąsk nioeòblëczalny (dlô klôrownotë dodóm, że z ùżiwków to ùżëwóm blós tobaka). Smieszno to wiedno w czims taczim je, bò chłopòwi sã zrobiło kąsk głupio (choc przekònóny ò tim, ze bëło to szczeré to nie jem) ë chcôł jakòs z tegò wińc ë rzecze mie z wësoka:

- Në to mòże cos rzeczesz pò kaszëbskù
na co móm krótkò rzekłé
- A co jô môłpa w ZOO jem?
Banana mie za to dôsz?

Në to chcemë le so zażëc

Visto-windowizna

Jakòs tak przëszed czas ù mie na to, bë w kùńcu pòrobic przë swòji ( he, në jo, przë jedny ze swòjich, a swòji to le blós z nôzwëska) internetowi starnie. Adresã jô ju miôł rëchli zamówioną, le jakòs czasu mie nie sygło bë tam zestôwic ùdbë przë jaczich móm robioné, czë téż dali robiã.
Në, jo – dôwno w php nick jô nié miôł ùsôdzone, në to mëszlã sã OK, zrobiã ë sfòrmatëjã zwëczajno w CSS bë zamkłosc rozparłãczëc òd wëzdrzatkù. Wszëtkò pòszło gładkò, testë wëzdrzatkù na róznëch òperacjowich systemach ë przezérnikach téż ë móm to òpùblikòwóne.
A w niedzélã jô bëł ù kùzynczi òd mòji białczi, sedzã z ji chłopã ë sprôwdzóm ù niegò starnë na Visce (sóm tegò diôchelstwa nié móm) ë widzã, że mie sã w tim szice z tegò zrobił prôwdzëwi Cascading Style Sheets !!! . Pòzachòdzëłe wszëtczé lédżi na se.

Generalno to nié móm w zwëkù feste szkalowac na MS, le pò tim co jô ùzdrzôł, to mie szlak trôfił zwëczajno. Ti pùrtce mielë ju wiedno problemë ze wspiarcã dlô CSS (ò CSS2 nié gôdóm ju wcale).

Në le co sã miało nibë zmienic w filozofijë firmë, co trzëmô sã za “kreatora sztandardów” ?
Pò prôwdzë nick!

WP-wersëjô csb

Móm wama napleszczóné, że wësztartëjã z nową wersëjã kaszëbiji òpiartą na drupalu na Jastrë, a skùńczëło sã ù mie to wszëtkò na dolmaczënkù (kòntinuacëji) nowi 2.5 wersëji WordpPress na kaszëbsczi

Tak mie to wcygnãło ë dôwało (dôwô jesz) tëli szpôsu, że móm wszëtkò jinszé (wnet) pòrzuconé. Efekt òd starné sprôwnika załącziwów na òbrôzkù. Za sztërk bãdã dodôwôł dali dolmaczrnczi do wordpress.com, bë mòże w kùńcu dostac kaszëbsczi interfejs przëstãpny dlô wszëtczich.

Nową wersëjã dolmaczënkù móm dodóną do najich starnów linuxcsb.org, jaczé téż tak kąsk na bòkù przë tim dostałe nowi wëzdrzatk.

Ubuntu, Kubuntu – SKA

Móm ju wama pisóné ò tim, że nowé Ubuntu bãdze ju z mòżnotą wëbiérkù kaszëbsczégò jãzëka jakno domëszlegò dlô systemë. Całosc mòże przeprowdzëc na czësto prosti ôrt, co sã nama jesz nie ùdało wëdostac z Kubuntu, chòc tuwò mómë wiele wicy przedolmaczoné ë to jesz ni le przë Kubuntu, a téż przë KDE – czasa tak to ju z tim je .

Jem rad z tegò (na gwës téż robi to Michôł ), że na naji kaszëbsczé starnë ò Linukse jesz chtos z bùtna kaszëbsczégò jãzëka zazérô. Nie je to pierszô takô gòscëna, le mëszlã, że wôrt jã zapisac.

Në tej SKAszëbë – KaszëbSKA